工聯會多名立法會議員噚日同新任勞福局局長羅致光（CK）會面，CK似乎繼承前任張建宗出名嘅「長氣」作風，令工聯會原定下午4點半嘅會後記者會延至傍晚6點先開始。
外訪傾引入柬傭
估唔到左派政團議員對民主派背景嘅局長咁鬼buy，會後對CK好評不絕，其中何啟明話席間花咗較長時間商討取消強積金對沖，雖然CK未有確實方案，但展現到誠意同方向，又話CK對退保問題嘅答案對工聯會有「新驚喜」，大讚CK諗法貼地。
而CK今日則會啟程柬埔寨訪問3日，同柬國勞工及職業培訓部部長等官員會面、拜會中國駐柬埔寨大使熊波，兼且同職業介紹所、非政府組織同商會代表見面，就促進柬國國民來港做家傭交流，勞工處處長陳嘉信會隨行。2號先上任副局長嘅徐英偉，返工一個星期就有得喺CK離港期間署任局長咯！