仲有個幾月就到中秋，中大校長沈祖堯「出品」嘅愛心月餅啱唔啱胃口？中大上載祖堯BB夥拍中大校友、前主播方健儀一齊整餅嘅片段，二人邊整餅邊談對寂寞嘅睇法，祖堯BB好感嘆咁話：「有時好多人喺你身邊，都可以有一種寂寞嘅感覺。」
整月餅大感觸
何解咁感觸？佢話試過臨瞓前睇電話見到太太傳嘅短訊，令佢好奇怪，皆因太太根本喺隔籬，所以有感現代人對住電話仲多過對人，就算喺一起，都各自喺「好寂寞嘅電腦互聯網空間」，可能中秋節嘅人月兩團圓，觸動到祖堯BB嘅小心靈。
唔好忘記，條片其實係hardsell月餅，祖堯BB話食月餅時會分幾份，叫埋多啲人一齊食，順便傾吓偈。其實中大已經連續3年推出愛心月餅，每售出一盒，中大就會送出一個月餅畀獨居長者，祖堯BB當然都呼籲大家多多幫襯！