林建岳為慶祝前日踏入60大壽，連續兩晚在中環的好酒好蔡設宴同歡，繼前晚招呼政商界人士，昨晚就輪到宴請演藝界朋友。昨晚7時許，楊千嬅、鄭伊健、林嘉欣、任賢齊、余文樂、蘇麗珊、蔡一智、王菀之、蘇永康一家三口、梁漢文、王敏德夫婦、顏卓靈、林曉峰夫婦、導演劉偉強、水原希子等群星畀面到賀。
爆飛遮瘀事
千嬅以一身高爾夫球look現身賀老闆，她坦言：「今晚dress code係打golf，套衫借番嚟。因為自己係旗下歌手，所以今晚都會唱歌，不過仲諗緊唱乜，因為我啲歌都係悲情嘅，有預備禮物，都係運動用品。」問是否識打golf？千嬅自嘲：「嘩！我好大鑊㗎，本身都有打過，但係連棍都飛埋出去，一係打空氣，所以自己都係等成熟啲、有耐性啲先再學囉。」她更自爆瘀事：「試過接囝囝放學，連把遮都飛甩手。」
伊健送嘉欣
問到伊健送甚麼禮物給老闆？他笑說：「送林嘉欣囉！佢乜都有，我哋嚟食飯都OK，不過嘉欣話想送份禮物畀老闆，我哋咪夾份囉。」林嘉欣坦言：「因為我接受唔到兩手揈揈咁嚟，所以揀份靚嘢。」連續兩晚到賀的蘇永康，昨晚帶同四個月大的兒子Jazz和太太出席，Jazz跟蔡一智、梁漢文、王菀之合照時眼仔睩睩好搶鏡，蘇永康說：「因為BB出世第二日，林生已送禮物到醫院，所以特登帶囝囝出席。」
此外，寰宇老闆林小明與女伴、余錦基都畀面出席。而林建岳的母親余寶珠、子女及知己Michelle都現身，而異母兄長林建名就攜子女林孝信、林煒珽現身。
採訪：黃曉妍
攝影：仇志德
