返到香港，就接獲新亞校友會理事姚濬康通知，新亞夏季Best Friend暑期籃球訓練營頒獎禮在7月29日星期六下午在新亞書院梁英偉體育館舉行，要左丁山去捧場。姚師弟係1999年電腦科學系，素來熱心校友會事務，今年校友會周年大會選舉新一屆理事會，只有姚師弟一個內閣參選，故此姚師弟篤定做下一屆新亞校友會主席。都應該嘅嘞，中大嘅校友會頭頭經常係70年代、80年代畢業生掌舵，現在輪到90年代校友上莊，誰曰不宜，老一輩應該退下，最多做校友會顧問嘅啫。姚師弟呢位候任會長幾有魄力，知道新亞圓形廣場嘅畢業生名牌行將用盡，為應付未來二十年需求（現時學生唔喜歡電子名牌，一樣要求有名字刻在圍牆鋁片上），周圍諮詢意見，請到何培斌教授做建築設計顧問、建築學院校友設計，得學生會、校友會、校董會同意，兼且籌得所需款項（一百萬元以上），今年就會進行加建「畢業生名字圍牆」工程，各方稱善，本屆校友會會長黃浩潮校友領導有方也。
姚校友去年又諗到新意思，籌款成立一個體育獎學金，以吸引體育尖子入中大選擇新亞書院，並且舉辦一個新亞暑期籃球班訓練營，邀請中學派隊參加，去年冠軍就係男拔萃，男拔隊長韓天次（現役甲一組球員）後來就入咗新亞書院，今年在姚師弟策劃下，搵到英皇、聖約瑟、港華仁、聖言、陳震夏、鄧肇堅六間中學籃球隊同學入住新亞宿舍，每日接受教練訓練，然後在7月28日及29日進行比賽，決賽在29日下午3時舉行。
左丁山入到場，只見聖約瑟書院校隊大戰香港華仁書院校隊爭奪冠軍，聖約瑟似乎合作慣熟傳球（pass the ball）有默契，有兩名同學射三分球十分準繩，故此一路壓住華仁，港華仁靠楔入籃底及中距離投射，不過合作就比較一般，雖然在第三節追到只係落後四分，但第四節就無以為繼，卒之聖約瑟輕勝，賽後有中學明星隊對新亞教職員校友隊，我地叫陳震夏中學校董李明逵落場，李一哥話：「五十年前就落場，𠵱家膝頭唔掂！」新亞隊之中有現役甲一組球員黃鎮偉（香港代表隊隊長）、袁家豪、韓天次等，贏波係意料中事，旨在友誼聯繫而已。頒獎後影全體相，六呎四吋高嘅李明逵仍然全場最高，年青球員及學生最高嗰兩位只係到佢耳仔咁上下，怪不得50年前李明逵代表新亞校隊，可以搶盡籃板球。各隊球員皆得豐富球衣球鞋戰利品，此則要多謝Nike贊助了。