今年50歲嘅王祖賢息影後，一直定居加拿大溫哥華，間中都會喺微博貼近照update吓近況。前兩日，佢又晒出新相，仲留言：「悠閒自在，快快樂樂的過每一天。生活就是簡單的過日子，最無價的就是平淡的快樂～」，相中王祖賢除咗永遠嘅飄逸長髮，眼大鼻高加上白滑緊緻皮膚，點睇都唔似半百年紀。
87年王祖賢以《倩女幽魂》「聶小倩」一角紅遍全亞州，唔經唔覺，電影上映已經係30年前嘅事，王祖賢亦有留言話：「《倩女幽魂》30周年，大家還記得小倩， 感謝有心人，很開心。」
不過，網民唔知係咪太掛住王祖賢，近日就翻出女神28年前喺節目開金口唱歌嘅片段。節目中，王祖賢唱嘅歌《思念是一種病》，係當時男友齊秦打算作俾佢唱，點知王祖賢一開口，唱唔夠兩句就開始走音，加上表情動作僵硬，嚇窒唔少人，齊秦最後將首歌留俾自己唱。有網民就話「上天係公平嘅」，亦有人話好彩王祖賢揀做影星而唔係歌星。