網上經常有職場潮文，無論是真或假，多少都道出打工仔心聲。早前便有電視台前主播在Facebook爆seed大鬧90後遲到上班，但準時收工；也有網民po文，「見客食飯，係咪唔叫得華田、好立克？」引起熱話。職場學問深似海，但少年太年輕，躺着也會中槍。僱員再培訓局課程導師盧家偉嘗試為新鮮人拆局，避過槍林彈雨。
記者 王家文
遲到早退是大忌，但準時收工都中伏？
「其實唔係太大問題，最重要係完成手頭工作。最慘情況就係，坐喺度磨時間，死都唔走，博表現自己可以OT（加班）。唔想磨時間，其實可以問上司，有冇其他工作要做，交代聲。當然唔好未夠鐘就執定嘢，或者無端端走咗去，最少向同事講聲Bye Bye，係基本交流。」
有人就有是非。如果同事跟你講是非，掉頭走抑或加把口？
「除非你本身係好八卦，好想知。如果唔係，就當聽故事，唔好加鹽加醋，唔好有咁多個人睇法，最多直述番同事講嘅嘢，避免畀人覺得你好想投入其中。有啲人只會聽，或者微笑吓，其實咁樣做少少就可以。」
「死貓」好難食，若不幸遇上，硬啃還是罷食？
「要視乎情況。如果踩到底線或牽涉人格，要講清楚。如果係工作上，應先補救番。好多時（食死貓）心裏係唔好受，但有時食咗，不斷去撐，反而令人覺得你狡辯，唔成熟嘅表現，總之做番好自己。」
見客食飯，只可以coffee or tea（咖啡或茶）？
「其實飲啲乜問題不大。如果飲朱古力、好立克係你嘅習慣，冇乜問題。飲奶茶、咖啡喺職場係幾常見，但一個成熟表現，都唔剩係靠杯咖啡或奶茶。如果你飲杯齋啡會胃痛，最終都係得不償失。」