香港迪士尼樂園正進行擴建計劃籌備工作，其中「明日世界」園區嘅遊樂設施「巴斯光年星際歷險」，營業至本月31日後關閉，之後進行改裝工程，變身以Marvel超級英雄為主題嘅互動射擊遊樂設施。
樂園今日起至31日，安排巴斯光年現身明日世界區內嘅巴斯光年星際歷險入口附近，同市民合照。巴斯光年下月起會歸隊回到「反斗奇兵大本營」會眾，迪士尼亦特別推出相關主題貼紙喺明日世界免費派畀市民收藏。「奇妙處處通」會員聽日起親身到樂園內嘅奇妙處處通會員服務中心出示有效會員卡，即可獲贈「巴斯光年星際歷險」紀念特刊一本，數量有限，送完即止。
巴斯光年星際歷險係建園以來嘅恒常設施，乘客可駕駛太空巡邏車以雷射槍射擊邪惡嘅索克天王奪取高分。