【專題籽：居安思藝】
簇新家具提早見閻羅王，垃圾站是奈何橋，堆填區乃地獄，鬼門關外滿是環保分子，拖走陽壽未盡的枱椅櫃床。全職刺繡手作人廖燕芳（Doris） 都拉過不少出關，家中的梳化、通花層架、雙人床等都曾被棄置街頭。問到何解不怕它們骯髒，沾上物主不明的毛髮油脂皮屑？Doris妙回：「我成日買vintage衫，都唔知幾多人着過啦！我冇乜顧慮喎！」妳贏！
「咁平？」、「執嘅？」記者化身問題中女，對Doris的二手家具充滿不能置信的疑問。然後問號轉為感嘆號：「好古典呀！」、「一睇就知係設計嘢！」。Doris與丈夫搬進南丫島這個500呎村屋單位一年，家中除了擺放逃出鬼門關的好物，Doris早前更在二手家具群組尋寶，買了讓我冒心心眼、來自傢俬店Homeless的vintage學生枱、湖水綠色金屬椅及木信架。丈夫同樣愛舊物，包括從其他古物店買來的濕電時鐘、黑膠唱盤，還有部很有年代感、購自深水埗的收音機。
中環天橋底執新淨梳化
Doris笑說：「佢十年前買㗎啦！我好鍾意聽電台節目。我出出入入，部機會發出『沙沙聲』，我有諗過係咪我有鬼附身，影響咗接收。」對於她突如其來的幽默，我笑了。「我鍾意用收音機聽『收音機』。」校天線、調音量、扭啱台，低科技卻有高濃度情懷與浪漫。「我用過app聽，會有時差！我鍾意聽《口水多過浪花》，好想同Do姐傾偈，所以我要聽live，某次鼓起勇氣打電話，但唔通，之後就冇再打。」說罷自己哈哈大笑。或許天賜儍人得儍福，執垃圾過程她得到的都屬禾稈下的珍珠，包括大廳的木框灰色布墊梳化。「中環天橋底執嘅，朋友幫手一齊塞入貨van車去碼頭，上到船就放喺貨物位置，仲要搬上一樓屋企，好重好辛苦，又整到好污糟，點知用濕布沾番𤩹水抹又畀我抹到好乾淨！」北歐風梳化軟墊夠彈力，非常舒服，外形也襯絕古典地磚。
南丫島居民愛群組尋寶
很多家具她都在南丫島二手物品買賣群組Lamma Island Marketplace購得，全部新淨便宜。「呢度好多外國人短住，搬走就會有好多唔需要嘅家具。佢哋會放出來平賣或者畀人免費攞。」以往住市區的Doris見過不少狀態良好的枱凳流落街頭。「喺學校門外執過一張學生枱，點知過咗一陣再返去，見到其他枱被工人砸爛丟到垃圾站，嗰刻好嬲，唔明點解咁大嘥，但係諗番自己以前都嘥過好多嘢，希望大家逐步減廢。」住離島讓她與大自然拉近了，刺繡出品也滲入環保元素。「我創作咗個系列叫『森林守護神』，故事講砍伐樹木嚴重，太陽神搵唔同使者保護森林。」Doris還身體力行走到山邊「拯救」附近居民清理花園時棄置的植物。「仲好新鮮，蘆薈、海棠、長春籐執番來用泥種就識繼續生。」
facebook：by.dorisliu
記者：葉青霞
攝影：徐振國
編輯：馮秀珍
美術：孔文彬