對23歲香港見習騎師巫顯東（外號東東）來說，他當天初出茅蘆即「瀨嘢」，個人在港首日（去年9月3日開鑼日）上陣即犯規被罰停賽。
這個反高潮促使這位小伙子痛定思痛，下定決心提升自己，結果他自強不息下殺出血路，在個人首個本港馬季取得突出成績，以24場頭馬排行上季騎師榜第11名。
問：東東，你喺上季開鑼日初次上陣，但開局唔理想，喺特首盃騎「崇山寶」（已退役）入彎時阻及對手，被罰停賽三日，係咪好似一盆冷水照頭淋？
答：嗰陣衰在自己過份緊張，冇細心睇位，喺香港跑馬，攞位要快、狠、準，同以前喺澳洲受訓完全唔同，一時之間適應唔到，第一日出賽就犯規停賽，心情down咗好耐。
問：你在香港策騎四個月，終於喺今年元旦日憑「炸魚薯條」喺直路賽開齋。據聞，見習騎師學校教頭高雅志喺賽前俾咗一啲錦囊你，唔知係一個咩錦囊呢？
答：用提示形容更加貼切，高雅志留意到我喺最後400米經常開鞭，佢睇穿係我過份緊張，不自覺會用多咗鞭，佢提醒我唔應該太依賴馬鞭，應該先靠自己推騎，令賽駒加速走順晒，然後再用鞭輔助。佢呢番話幫助好大，現時上陣都記緊，亦係季尾成績有進步嘅原因，「獅子聰」同「駿馬翹楚」一放到底帶到終點，唔係只靠用鞭，自己都覺得幾滿意。