近年落後於整體政治形勢、立法會一席不保嘅民協，近日又有新搞作，由32歲嘅深水埗區議員楊彧（音：旭）拍短片上載到fb，介紹荔枝角填海區一帶嘅未來發展，巨細無遺，似乎民協唔再由馮檢基擔綱，畀人耳目一新嘅年輕感覺。
楊彧喺片中有乜好介紹？原來係透過航拍，以高空鏡頭介紹荔枝角海旁日後點樣翻天覆地（上圖），區內將有一所輕度智障特殊學校，臨海兩幅地皮將拍賣，一幅做酒店，一幅做私人住宅，楊彧預料兩幅都會係九龍新地王，而提供1,300個單位嘅公屋海盈邨明年中落成，旁邊5幢居屋則預計2019年落成。
楊彧仲預告，臨海地皮嘅中心即係六號地盤，會有區內期待已久嘅公共設施，屆時亦有行人天橋駁通私樓、公屋同港鐵南昌站，等大家唔使日曬雨淋。