【本報訊】早前確診初期肺癌的支聯會主席何俊仁,上月21日接受手術後,只休養約兩星期,上周五已在律師樓復工。何俊仁受訪時笑指,其律師樓多年來接下大量社運相關的案件,而前特首梁振英上場後,由DQ到佔中案,更令律師樓應接不暇。他自稱「死神喺身邊擦過」,若遲兩年才發現,癌細胞或已擴散,「今次真係好微妙安排,畀貼士我,上天唔收我住」。
記者:陳雪玲
術後受訪的何俊仁精神不錯,昨午已在律師樓埋首工作,一邊說要節制工作,「做唔到咁多」,也不能令自己太辛苦;一邊又指「(但)好似一地兩檢咁大單,你同唔同佢做吖?」一句「郭卓堅成日上嚟」,「覆核王」隨即在訪問後現身,與何侃侃而談。
政界都說65歲的何俊仁是大好人,就連「死神」都放好人一馬。何俊仁自言發現患癌可謂機緣巧合,早前出席姪女的婚宴,同枱一位醫生提醒某親戚做磁力共振檢查,「嗰個人不為所動,我聽完反而有興趣,就落咗叠……我嗰時都幾忙,唔知點解又去試吓,做完都唔記得,報告返來話有個影,有粒嘢唔多對路」。
為劉曉波推遲手術10日
何俊仁在7月3日收到報告結果,但其時正為諾貝爾和平獎得主劉曉波病危一事,一連3日約見各國領事,最終手術推遲了10日,「本來想做埋(劉曉波)頭七,但嗰日做完電視節目(訪問),已經攰得好緊要,我驚病咗醫生唔肯同我做,所以當晚就返咗屋企,之後嗰日去醫院做手術」。
手術成功,醫生診斷何俊仁的癌細胞擴散機會不大,不過,何自小有哮喘,肺功能本來已經不好,「𠵱家(手術後)冇咗一個肺葉」;加上何年紀大、工作忙,醫生對他的身體狀況有些擔憂。何則笑言「自我感覺良好」,深信只要多做運動,餘下六成肺功能仍會很強,自問是看得開的人,認為精神狀態才是關鍵。
是否該考慮減輕工作量,如支聯會主席一職是否可交棒?何稱:「要有人肯做先得,有啲有能力接,但基於某些原因係唔想做主席……一到有大事出,主席要面對好多壓力,好多人未必想(出任)……只係關心、有少少熱心,都唔足以接到支聯會主席個位;你要對運動有好深厚嘅承擔、對要幫嘅人民有好深厚嘅感情、要熟悉支聯會運作。」
支聯會主席一職未退,律師樓工作量亦難以減輕,何直指「嚟緊日子好多重要官司、好多出事嘅人,就算以往對我哋唔係咁好嘅人,多數都係來搵我哋。梁游搵我哋,梁天琦、本土派……長毛係『大客』啦……呢個事務所我要喺度,好多管理啲嘢要做」。