事業同愛情，係咪真係兩極嚟？今年5月，唐詩詠喺ig宣佈同洪永城分手，由「互相認真相愛過」到「變回好朋友」，結束咗兩年半戀情。
喺差唔多時間，唐詩詠事業90度角直線上升，曝光率喺同輩女星之中都算數一數二，同王浩信嘅電視劇《不懂撒嬌的女人》仲好收得，做埋螢幕情侶一出齊出騷搵錢。雖然冇答到係咪搵到過百萬外快，但佢都大方承認離買樓近咗一大步，甚至有報道指，唐詩詠已經做埋老闆娘，喺SOGO賣蛋糕。
唐詩詠同王浩信嘅合作，唔只係活動咁簡單，嚟緊仲會夾份開cafe，6月嘅時候王浩信講過，會投資6位數字金額，到近日終於有進展！王浩信向雜誌透露已經睇啱舖位，但未可以講得太詳細。
事實上，已經36歲嘅唐詩詠人越大，越多諗法，唔再係以往小家碧玉、鄰家女孩嘅形象，反而多咗嘗試，露腰、晒腳，甚至係谷胸出席大小盛事。生活無拘無束又識諗，係抵佢搵到錢嘅。