近年私人樓盤名，鬥豪鬥誇鬥氣派，查實打開個盤一睇，又係劏房一個，所以，改個好名真係好重要，簡直就係一門專業。高登仔最近開咗個題，號令巴絲打幫公屋改番個靚名，等公屋畀人嘅感覺grand一啲，創意一發不可收拾，原來，要浮跨，其實唔難，四字並排中間加一點、將個中文字拆開，又或者用街號、用英文、甚至用法文，都即時令公屋升級。
樓主先將觀龍樓變成「觀龍‧璽」、彩園邨變做「彩之花園」，係咪頓時高貴好多？例句引發網友爭相回應。天耀邨玩拆字，變「御天‧光翟」、隆亨邨齋用英文拼音「 LangHem Place（Palace係咪更加勁？）」、華富邨就咁「華‧富」已經夠殺。
嫌牛頭角下邨太cheap？升格做「九龍灣一號」又如何？唔少長者聚居嘅老邨漁灣邨，變成「港島‧東之巔」，黃大仙下邨個名太街坊，變成「仙‧下凡」係咪high-class好多？利東邨就索性用法文，變成Le décontracté、Le tranquille，唔識讀就啱晒，咁先更覺升格。
睇完咁多例子，有網民綜合到一個現象，「其實最重要係咪加個一點？」，「成個感覺即刻高級哂」？