職場初哥，經常被「old seafood」評頭品足，由見工面試、上班衣著，到工作態度，無一看得順眼。由80後點點點，90後又咁咁咁，輪到今天千禧世代，自我、懶醒、「hea做」，幾成標籤，負面定型。其實每個年代，不同行業，總有一件「極品」在公司，同事討厭「自信狂」，老闆最怕請着「天然呆」。職場新鮮人，你又屬於哪一類？
記者 王家文
雖說性格決定命運，但往往見工時會忽然扭轉，改變一刻命運。面試時主動積極，入職後打回原型，欠動力兼沒反應，套用日本潮語，就是「天然呆」。盧家偉見得多，不時有僱主反映，新入職的年輕人主動性不足，「冇乜信心，又驚講錯嘢，好緊張，唔知（自己）有乜可以貢獻，甚至覺得好悶，就會成日發呆」。
盧家偉是僱員再培訓局課程導師，在基督教香港信義會任教個人素養單元多年，對象多是年輕人。他說屬於「天然呆」的職場初哥，大多因學歷不及他人，做事沒信心，顯得退縮，踢一腳，只動一動，「叫佢幫手做嘢，只係點吓頭，都唔知佢聽唔聽到，會唔會做」。另一類則自恃學歷好，以為是天之驕子，「投身社會工作就覺得我係天下無敵，樣樣嘢都搞得掂」。
有信心是好事，太自信就累事。盧Sir說，年輕人表現工作能力實屬正常，但不應過份自信，「唔好一嚟就搶先講晒所有嘢，得你講，冇人講」，鋒芒太畢露，容易被排斥，「同事會覺得新人可能博表現、演嘢，但又畀人覺得好似冇乜料到」。他說可先容讓同事發表意見，再作補充，既發揮能力，也不失他人，減低人事磨擦。
無論「天然呆」抑或「自信狂」，若要人不知，下一句，新世代一定知。盧Sir說，有僱主聘請一名90後處理文書工作，但他天天上網開Facebook、WhatsApp甚至淘寶網，「每日工作就好似處理緊佢嘅私人事務」，以為瞞得過上司和同事，「其實個個都知」。他說近年很多僱主反映，員工處理私務忙過公事，「喺Facebook畀like、回應，睇番個時段，其實就係返工時間」。
每年大學生畢業後，接着文憑試放榜，勞動市場都湧現生力軍。盧Sir說，這一代新鮮人，離開校園初踏社會，最難適應是殘酷的現實，「以為好似打機咁，可以restart（重生），做錯咪重頭嚟過囉，畀人感覺不負責任」。他說當學生可能只要應付考試，但打工要處理很多突發工作和壓力，未能調節心態，便只剩下埋怨。
「覺得上司對佢唔好，又忙，搵得又少，佢就會放棄唔做。」盧Sir坦言，適應不了職場環境，即使再找另一份工，情況都依舊，只是逃避，「無限咁loop（循環）」。他說年輕人應先掌握個性，在工作上多與人溝通，尤其了解同事和上司的性格，如對方急進、進取，自己屬慢熱，可調整一下態度，找出相處之道，「如果唔係，你永遠都唔能夠喺職場裏面生存得到」。
近年不少僱主呻到葉落，慨嘆新一代大不如前。盧Sir不同意，認為他們成長於互聯網發達時代，視野較從前廣闊，也擅用社交媒體，可為公司帶來新概念，甚至增值。他說有90後員工便替公司成立Facebook專頁，開拓網上行銷，「對於老闆或資深同事，佢哋開個Facebook account（戶口）容易，但做一個Page（專頁）係比較陌生，90後就覺得好簡單」。
今天80後已過氣，輪到90後當道，千禧代也崛起，但對每一代新鮮人而言，擅用優勢，改善不足，是職場不變的金科定律。