側田05年出道八個月，當年只係出咗一張十首歌嘅唱片，已經可以踏上紅館舞台，創咗一個最快踩入紅館開個唱嘅新人歌手紀錄，到𠵱家都仲未有人破到，𠵱家咁嘅市道，相信都好難破到！之但係，升得快，跌得應，側田之後爆出一連串負面新聞，加上態度唔好，最後要離港北上避風頭，繼而轉戰內地市場。
今年41歲嘅側田，有人話佢已經變咗，成熟咗，大個咗，三年前，佢悄悄咁返咗香港發展，整頓過後嘅側田，終於可以再戰紅館，佢宣佈今年12月舉行第七次演唱會，最近仲同肥媽featuring咗首新歌《450蚊》。
講以前個唱價錢
點解係《450蚊》，原來背後係有原因，側田話呢首歌其實係講以前演唱會，最貴門票係450元，歌詞就係平時同大班朋友去音樂bar，玩吓玩吓jam出嚟：「入到錄音室覺得要有把女聲，一諗就諗到呢個人一定係肥媽，錄完更加覺得肥媽幫首歌點咗睛，真係只有佢先做到呢個味道。」
當日錄音，肥媽仲忽然爆肚，佢聽到側田唱450蚊，肥媽就話：「以前？以前我係處女，𠵱家唔係吖嘛！」雖然本來唔係歌詞之一，但監製最後連呢句都用埋，側田話聽番都覺得好好笑，覺得好正！
撰文：馮仁昭