東道主荷蘭女足周日喺女子歐國盃決賽，主場面對丹麥女足喺先失守下以4:2反勝，歷來首次封后。荷蘭開賽六分鐘就落後，好彩隊中前鋒美迪瑪喺四分鐘後建功扳平，穩定軍心，戰至完場前再入一粒奠定勝局。美迪瑪喺今屆女歐盃共入四球，獲賽事銀靴獎，射得之餘更有賣相。
周日英格蘭社區盾阿仙奴反勝車路士封王，阿仙奴女足亦有喜訊，美迪瑪喺今年五月落實由拜仁慕尼黑轉投阿仙奴女足，將添上女歐盃冠軍身份加盟。呢名21歲荷蘭前鋒擁有1米75嘅身高，2011年喺荷蘭球會海倫芬冒起，到2014年轉投拜仁，到來季轉戰英格蘭。
美迪瑪賽後話：「我到𠵱家仲唔敢相信我哋贏咗冠軍。己隊喺上半場陷於苦戰，丹麥嘅表現實在太精采，好彩到下半場我哋成功扭轉形勢，實在太高興嘞！」
至於同樣喺決賽取得入球嘅翼鋒馬田絲同樣樣子甜美，佢更獲選為今屆賽事最佳球員。