上屆梁班子，大家都見到時任特首梁振英同財爺曾俊華貌合神離，估唔到換咗林鄭上場，情況一樣！係人都知陳茂波唔係林鄭嘅心水財爺，但阿爺話要，林鄭唔通say no？結果波叔順利過渡，但個位確實惡做，有政圈花生友近日議論紛紛，細數林鄭上任一個月，疑似「三戲」波叔，話戥波叔陰功喎！
花生友等睇過招
金管局前總裁任志剛日前「重出江湖」撰文，頭炮講到政府理財哲學，本來任總分享「個人觀點」冇乜大不了，但林鄭竟然搶住話觀點同佢「異曲同工」，完全唔畀面特區政府嘅「真．財爺」，難怪引起政界譁然，亦令田少等人出po諷刺。
而林鄭上任後已非首次當波叔冇到！大家記唔記得7月初，林鄭召集司局長出席集思會，當時因公缺席嘅官就係陳茂波。到底係咪唔可以提前或押後，等齊腳先brainstorm？答案當然冇絕對，但就令人猜疑林鄭點界定「團隊」？皆因波叔已經喺林鄭嘅財金靠山同支柱都榜上冇名，再次被冷待，唔通當佢唔存在？
估唔到被迫「缺席」後，就連刻意出席都成詬病！林鄭早前拖幾位同聲同氣局長去工總晚宴，突然主動「講笑」話波叔可能驚佢要「點名」，所以特登嚟打卡後走人，現場賓客聽完都覺呢個gag，對波叔認真不留情面，林鄭仲曾經喺談及蔡若蓮傳任副局長時，反指波叔都好有爭議；言者或無心，聽者肯定有意。
雖則有人戥波叔陰功，但大家又千祈唔好睇小波叔，一時三刻嘅屈辱，唔會影響佢「負重」，否則點可以經歷劏房同囤地風波，依然大踏步走入財爺官邸？佢同林鄭點樣過招，花生友都話值得擔定凳仔等住睇。
李八方