吳業坤和王灝兒（JW）前晚於旺角麥花臣場館開騷，JW的富貴男友Tarzan現身力撐，麥明詩孖一男一女友人支持，其間還挨近男友人身邊，完騷後她自爆對方是曾與她傳緋聞的藥房太子爺：「佢係朋友嚟啫，因為現場太嘈，所以先靠到咁埋。」
被譏多女友
未知是否因男友監場，JW和坤哥合唱《小酒窩》時企到離行離列，兩人不時在台上互窒搞氣氛，JW着低胸衫用外套遮掩，坤哥拿相機作狀離遠高炒，又笑說：「以前同娜姐（周秀娜）唱過《小酒窩》，雖然你哋髮型差唔多，但係有啲嘢唔係咁囉。」
當兩人合唱《羅生門》時，JW唱兩句後突然叫停喪咳要飲水，笑說：「因為自己突然起痰，一定係見到坤哥。」坤哥反問：「你知唔知起痰係乜意思？即係鍾意我。」JW馬上否認，還笑對方的緋聞女友多到可開一場演唱會都夠坐，坤哥說：「咁我畀你坐主席位嘞。」JW即說：「我都唔係你緋聞女友。」坤哥鬼馬地回應：「你遲早都係啦。」最後JW在台上開心宣佈明年1月6日踏足紅館開處女騷。
提男友冧晒
完騷後JW和坤哥受訪時指雖然唱情歌，但不需要扮到好sweet，JW否認因男友在場關係，提到男友睇足全場，她冧爆：「係呀，佢都好支持我，同一班朋友一齊嚟。」問坤哥唱《小酒窩》是否嫌JW身材不夠娜姐好？他衝口而出：「唔係呀，佢都好勁，所以搞到我都甩歌詞，佢係健康嘅性感。」
採訪、攝影：王連連