香港隊喺上月底於荔枝角公園體育館舉行嘅世界足毽錦標賽，喺主場之利下攞到4面銅牌，創下歷來最佳成績，10月下旬再接再厲，遠赴德國參加公開賽，希望凱旋回歸。
2000年加入港隊嘅張駿明負責主攻，喺賽事中協助港隊奪得男子團體項目嘅銅牌。佢接受政府新聞網訪問時話，主攻手要以掛毽、踩毽等扣殺動作攞分，要有上佳柔韌度同彈跳力。原來佢中學時代已經開始踢毽，最初只係小息時踢，越踢越有興趣，20幾年來踢出小天地，參加過學界賽同香港聯賽，其後入埋香港足毽隊，最難忘2010年世錦賽，因為當時合作無間嘅戰友突然受傷，無法出賽，令佢好大壓力。
香港足毽隊教練吳耀強就話，足毽係趣味同競技並重嘅運動，希望運動普及化，甚至有日成為亞運項目。