內地超模秦舒培跟陳冠希拍拖，之後傳出有咗，兩位當事人一直都冇認過，故作神秘，今年3月有消息傳出秦舒培成功誕女，陳冠希亦都係無公開認過自己做咗爸爸。直至早前突然有指係陳冠希友人嘅外籍朋友，上載咗陳冠希同秦舒培女兒百日宴嘅相，搞到佢因為咁樣好嬲。自嗰次之後，陳冠希索性自己擺相，以擠牙膏方式，逐步開放自己個女嘅外貌畀大家睇。上個月底，佢分享咗一張囡囡嘅腳仔相，下面有一大堆錢。大前日陳冠希分享嘅囡囡正面照，仲公開埋愛女嘅英文名Alaia，Alaia皮膚白、嘴仔細細似足媽媽。
抱住愛女
噚日陳冠希又貼相，今次張相，係佢抱住愛女Alaia嘅相，相中嘅Alaia伏喺Edison懷中熟睡，而Edison就流露出一副慈父樣，非常之冧，事後Edison女友秦舒培再Po出一張Alaia獨照，露出笑臉。而Alaia瞓住嘅毛氈，就係聽聞𠵱家有錢都買唔到嘅「Louis Vuitton X Supreme」聯名系列，搞到一班網民，又羨慕又妒忌，仲話Alaia咁細個就學足老竇咁，由細潮到大。
撰文：馮仁昭
