趁住全民運動日，唔少局長噚日出動同市民一齊做運動。公務員事務局局長羅智光Joshua就去咗蒲崗村道體育館露兩手，包括搓咗一陣乒乓波，睇落都有啲姿勢（至於實際……八方就唔知嘞！）。
查實Joshua局長之前都講過，聽音樂或者彈電風琴，能夠令佢煩惱全消，但音樂之外，佢都會抽時間去健身室做運動減壓忘憂。
做運動有乜好處，毋須Joshua多講，而佢明言做運動最難嘅就係堅持，皆因平日咁鬼忙，有空閒時間都只想好好休息，但每次做完運動，真係精神爽利兼頭腦清醒，所以都呼籲大家多啲郁動，又話政府唔少部門組織不同運動隊伍，定時練習兼比賽，鼓勵同事多啲參與。