特首林鄭月娥赴京拜訪部委，唔等於新班子官員可以趁阿姐唔喺度時唞一唞。阿姐話過吖嘛，問責官員必須瞓身喺「盛事」亮相，所以噚日康文署主辦嘅「全民運動日」，各問責官員都不敢怠慢，至少6名局長四出同市民做運動，民政事務局局長劉江華仲為此犧牲色相，露肉推動㖭，唔知會唔會博得阿姐擊節讚賞？
小肥張擔大旗主禮
林鄭身在北京，署理特首張建宗自然要擔大旗，佢噚日喺沙田區圓洲角體育館領軍出動同市民分享做運動嘅樂趣，除咗觀賞「快閃舞」表演，以及為親子律動同彩虹傘遊戲主持拋波禮，亦有參觀室內划艇、毛巾健體操、輪椅劍擊、地壺球同樂活動，更親自落場同小學生一齊玩室內草地滾球活動。
但係小肥張點樣落力法，都不及劉江華搶鏡，皆因劉華局長不惜犧牲色相，同市民做毛巾健體操時不慎露肉，而在場人士第一時間諗到嘅，相信只有呢一句「仲有最靚嘅豬腩肉……」而佢同小肥張參加彩虹傘律動遊戲時，就要反其道撐「拉布」以便拋接大球，其間仲要不時踎低後起身，有冇見頭暈？劉江華話冇喎。
李八方