在鹿兒島兩日，就打道回府，早上坐新幹綫返回福岡，到運河城君悅酒店取回大件行李，順便食個半自助午餐（自助頭盤加主菜及甜品），只需三千三百日圓，平夾靚，大概只係香港君悅食一碗海南雞飯嘅價錢。跟住就去機場，十七分鐘就到，快夾妥。
如是者順風順水返到香港，旅程認真愉快，心思思又想搵時間去多一次。日本數字顯示，香港人2016年遊日本有183萬人次，按年上升20.7%，2017年頭五個月，港人遊日有88.1萬人次，同比增加25%，最多人去大阪（20.3%），第二係去東京（17.8%），2016年有20.7%港客到過日本十次，你話幾狂熱呢……左丁山校友W太太就係其中一位，佢差不多每個月都去日本一次㗎。日本景色係唔係靚過中國好多？一位老友啱啱去完青海返嚟，有大批靚相睇，風景絕佳，令人讚嘆，但朋友話：「日本廁所令人有充份安全感，衞生絕對可靠，食物又乾淨，總之去日本就有一個安全、舒服、舒適嘅感覺，在中國旅行，有時似走難，搵衞生公廁已足以令你血壓上升！」
就因為呢點，我地打道回府之後，肥仔K還是意猶未盡，與太太帶住一歲仔、三歲女，一於冇有怕，繼續行程，從福岡坐巴士去本州之「中國地區」下關、廣島、岡山，然後去四國之高知縣附近，搵宮崎駿漫畫「千與千尋」之「道後溫泉」，最後遊大阪乘機回港，沿途用巴士，火車，渡船，汽車，拖住兩個嬰孩，左丁山都戥佢辛苦，不過佢話日本牛奶乳酪好味兼衞生，周圍有靚廁所，帶嬰孩都冇有怕咁話！
肥仔K話坐巴士去下關，諗番吓，1894年甲午海戰清廷大敗，日清簽下馬關和約，馬關在邊度呢？咪就係今之四國山口縣下關市囉。翻查資料，馬關條約於1895年4月17日簽署，清廷代表係李鴻章，李經方，日本代表係伊藤博文、陸奧宗光，主要內容係大清帝國割讓台灣、澎湖予大日本帝國，向日本賠款二億両等等。現在香港人去下關旅行，唔知會唔會去搵當年談判遺蹟睇吓呢？肥仔K就去咗「史蹟春帆樓 日清媾和談判場」影相，內有李鴻章手書，附近又有一條李鴻章道，歷史記載，李鴻章到馬關談判，險遭槍殺，幸好救回，大難不死，簽約之後就慨嘆日本將成中國終日之患，佢當然冇睇錯，睇錯嘅係回國後無膽力勸慈禧搞明治維新，埋下大清皇朝覆沒之伏線。