財經事務及庫務局前局長陳家強今日正式返新工喇。陳家強6月尾離開熱廚房之後，選擇返番去科大教書，早幾日華華同佢吹水，佢話佢嘅興趣係喺金融科技（FinTech）呢一瓣，先會了解一下大學喺FinTech嘅research做成點，再睇以後部署，不過今日就返去執一執間房先喇。
陳家強話，過去一段時間已經着手準備，同外面好多人了解FinTech行業嘅發展情況，返到大學，想幫手加強學生喺呢方面嘅研究，長遠當然希望將研究成果商品化。問佢是咪遲早做埋科大校長，事關科大校長陳繁昌將於明年9月離任，陳家強即刻一輪嘴講咗N次「唔係」，即管聽住先。
查實陳家強1993年已經加入科大教書，2002年升任科大工商管理學院院長，2007年加入政府，10年之後返去科大應該都係喺佢嘅劇本之內。
李華華