近排有個主打夢想嘅Facebook專頁，之前多數搵娛樂圈或者運動員講佢哋追夢嘅故事，最新一條片竟然係利嘉閣總裁廖偉強（Willy）嘅奮鬥小故事，除咗佢本人出鏡之外，少年版Willy就由香港空手道代表李振豪嚟飾演。
故事係講1989年六四之後，樓市交投淡靜，搞到連本身做到主管級別嘅Willy都要做番前線跑數。當時為咗爭取多啲接觸到潛在客戶嘅機會，Willy就喺枱頭電話Speaker掣，黐一個五蚊銀，等到一有電話打入分行，佢就可以一下拍落個五蚊銀，搶咗條線先，速度會快過就咁拎起聽筒零點幾秒，成為第一個接觸到客戶嘅地產代理。
Willy同華華講，雖然來電嘅人唔一定買或者租，亦令佢工作量大增，但最緊要係有機會，佢希望用呢件事，鼓勵為夢想打拼嘅人唔好咁輕易放棄。
李華華