在霧島酒店浸過溫泉，出外在停車場仰觀山林，幾乎有衝動上山一行，不過欣賞一番，逐見暮色四合，都係無謂留戀嘞，最多以後有機會就來此酒店住番一晚，要趁住還有日光之前，揸車返回鹿兒島城山酒店吃鐵板燒。至於午餐，既已錯過，也就算數，一於留肚吃鮑魚龍蝦與鹿兒島牛肉可也。
城山酒店餐廳「楠」係鐵板燒專門店，菜式有幾款，由每位九千日圓至二萬二日圓不等，最貴嗰款（二萬二）要預訂，臨時叫就冇得傾，於是左丁山揸主意要吃第二貴嘅「極上」，每位收一萬八千日圓，以當日匯率計，約莫係港紙1260元，去年曾在大阪一間酒店比較價錢，同樣菜式在大阪要三萬三至三萬四日圓，比城山酒店貴八至九成，香港即使俾夠二千四蚊，恐怕也吃不到，有咁樣嘅比較，就覺得鹿兒島食肆價廉物美囉，何況去到東京大阪，都係食番同樣食材嘅啫，如果單計食物，不計市區熱鬧玩樂，鹿兒島直情抵到爛。
一路食鵝肝、龍蝦、鮑魚、帶子、鹿兒島牛肉及時蔬，一路聽肥仔K講吓鹿兒島歷史故事。吃到幾飽嘞，還有驚喜，廚師煎牛肉之時，用一塊薄麵包墊底，吸收肉油，叫我地唔好連麵包都食埋。原來麵包這一塊，倒有妙用，吃過牛肉之後，廚師再將麵包夾上一細塊藍芝士，再反覆煎多三四次，將塊麵包變成薄薄的芝士三文治，嘩，一啖咬落去，甘香無比，本來已經食飽，還是忍不住要食完塊三文治，最後還有蒜子炒飯，話唔食得落之餘，卒之又吃晒落肚，誘惑實在太大也。小Y Y嘆曰：「返到香港，半年內唔好叫我食日本菜，邊度會有呢度咁靚而且相對便宜㗎！」食完佢就去做韓式spa兼浸溫泉，認真識嘆。
食完再聽番肥仔K講古仔，佢話南九州鹿兒島一帶，遠離江戶（東京）及京都大阪，古代民風強悍，不願聽命於中央，戰國時代嘅豐臣秀吉幾經辛苦，用九牛二虎之力，九州藩主島津先至投降臣服，後來有德川幕府，南九州雖然聽命，還是抱住山高皇帝遠心態，憑近海之利，與中國沿海及洋人搞貿易，係日本第一個引入西洋火槍，首先識得用火槍打仗嘅地方，明治天皇時期鹿兒島出生嘅西鄉隆盛就係著名反對派造反派，領軍作反，與政府軍發生西南之戰，戰敗而切腹（1877年），明治天皇竟然特赦之，於1889年追贈官位，於是西鄉隆盛成為鹿兒島近代偉人，出生地在鹿兒島市離中央噔不遠，已成為古跡。不過再翻查歷史，此君生前主張征韓征台，欲佔為日本領土，乃中韓之敵也。