霧島市霧島神宮，位於高山之上，離入口不遠，有一高大樹木，為杉樹，旁有木牌說明：御神木，樹齡八百年，高二十八米，「幹迴」七點二米，果然係神高神大之神樹，如擎天一柱；捍衛神宮。
翻查資料，霧島神宮初建於六世紀，後經多次火山爆發、火災損毀，多次重建，現在所見之神宮，係1715年由藩主島津吉貴所重建，島津家統治南九州數百年，歷代島津氏藩主凡有大事，皆到神宮參拜求神意，久而久之，霧島神宮成為南九州一所重要文化財產，已被日本政府定為「國有重要文化財。」
當今遊客，來此當睇風景，愛行山者，來此地必然高興，因為山林就在附近，滿佈參天杉樹。日本人對維護環境，做得周詳細緻，周圍乾淨企理，氣氛寧靜，係尋幽探勝之好地方。可惜我哋係標準「到此一遊，影相即閃」之典型香港遊客，幾難一窺此山全豹，假如有閒情逸致，假期夠長嘅話，大可到此仿效柳宗元：「……上高山，入深林，窮迴溪；幽泉怪石，無遠不到，到則披草而坐，傾壺而醉……」
神宮內圍，閒人勿進，在外圍參觀完畢，見天色陰暗，急忙叫肥仔K去停車場揸車到神宮外圍接我哋上車。果然好彩：開車之後唔夠兩分鐘，傾盆大雨自天而降，幾乎睇唔到路，沿山區小道下山，忽見一現代化建築，叫做「霧島酒店」，外有停車場，落客處有瓦遮頭，於是落車入去諗住飲茶嘆啡避雨，但夥計唔多識講英文呢，都係要肥仔K出馬，溝通後知道咖啡室已中午休市（當時係下午三點幾），但可以浸溫泉，每位收日圓一千（即七十港元），時間不限，嘩，仲正，即刻入去更衣，男湯面積幾大，有曼谷香格里拉酒店游泳池咁大，浸浴者只得三四位，梗係過癮啦，內有「明礬泉」，寫明係1624年發現，硫磺氣味特重，可助降血壓，有益關節咁講；亦有露天風呂，浸在熱溫泉之中，頭上雨點不斷打下，別有奇趣，池邊牆上有日本「一千年才出現一個的天才」，著名女作家與謝野晶子與丈夫嘅詩句，時維昭和四年（1929），晶子與丈夫與謝野鐵幹到此一遊，對溫泉大為讚賞，因而寫下讚嘆之詞。浸完溫泉，舒服晒，大雨及時而止，出外一行，只見山坡上杉樹成林，遠處霧氣（或溫泉熱氣）四起，空氣清新之極，幾乎想登山徑入山林一遊。心念一動，叫肥仔K問吓過夜價錢，房租只收一萬二千日圓，係和式榻榻米，但家人催走，趕住返城山酒店食鐵板燒也！