一日一杯港產絲襪奶茶係唔少香港人每日嘅指定動作，原來新任海關關長鄧以海係奶茶癡，佢噚日同傳媒茶敍時自爆飲奶茶成癮，一日唔飲奶茶會頭痛冇精神，佢高峯期會一日隊三杯。
鄧以海話喺2007年借調過去保安局策劃深圳灣口岸一地兩檢計劃時，醫生曾勸過佢為身體着想應該少飲奶茶，佢當時試過戒，但一唔飲奶茶，就會周身唔舒服，「試過瞓足10個鐘，都冇嚟精神，感到好攰」。但當佢飲番杯奶茶，成個人好似上咗電咁，即刻精神番晒，「就算做到半夜三更，瞓得好少，嗰日都仲好有精力」。呢位奶茶癡雖然近排身體有啲唔舒服，醫生叫佢要暫時戒飲奶茶，但佢都要每日飲半杯止癮。