噚日有立法會議員同一眾小巴承辦商將架19座位嘅小巴駛到政府總部，畀傳媒睇吓架小巴真身，點知當記者仲扑緊咪嘅時候，運輸及房屋局局長陳帆（梵哥）突然間現身，仲跳上架車試坐，成功吸引傳媒注意。
局長都好合作，就晒角度畀傳媒影相，又評論吓架車，佢話覺得架小巴坐落都幾舒服，相信會受市民歡迎，因為多咗個選擇。不過局長俾人問到點解運輸署審批速度咁慢時，佢就話運輸署要跟番程序去審批，以確保市民安全啊。
當大家想問多幾句時，陳帆就話趕住去開會，自爆自己係趁開會休息時間過嚟望吓咋，睇嚟局長都好關心呢架19座小巴喎。
上月初小巴增至19座法例就已經生效，𠵱家有3架19座小巴通過咗運輸署嘅檢驗程序，市民最快下星期二或三就可以坐到㗎啦，已知有兩架分別行駛101及20C路線，分別由坑口至西貢及大埔火車站至大尾督。