英格蘭半職業球隊比利列卡（Billericay Town FC），目前喺英格蘭第七級別聯賽比賽。球會為咗刺激士氣，喺上個月組咗隊由一班美艷女仔組成嘅啦啦隊「The Ricays」，諗住可以令班球員喺主場比賽會更加醒神。不過，班主格連譚普連喺上星期就決定炒晒佢哋，原因係有女隊員私下畀電話號碼球員，為咗唔好令班球員分心，所以要解散班啦啦隊。
比利列卡呢隊波名氣唔大，不過佢哋喺日前簽咗前利物浦翼鋒賓納（小圖），惹嚟唔少注意。做鋼鐵生意嘅叠水老闆格連譚普連，兼任埋球隊領隊，真正掌管晒生殺大權，佢上星期出tweet話：「我哋必須解散班啦啦隊。球員最近有啲欠缺集中，我亦知道有部份啦啦隊隊員將電話號碼畀球員。」啦啦隊隊長Bekka Batchelor對事件覺得好失望，之前一直努力排舞做好準備，點知最後冇得表演。
