利物浦歐聯附抽下籤！要爭取事隔三年後首次返去踢歐聯，紅軍首先要喺附加賽過關，不過周五抽籤就唔多好彩，撞正上季德甲第四嘅賀芬咸，八月15踢首回合，紅軍將由領隊高路普帶隊「回鄉」作客德國，次回合就喺八月23號返去晏菲路踢。
法明奴演倒戈戰
利物浦上季英超攞第四，要殺入歐聯分組賽就要先通過附加賽一關，對於種籽隊利記嚟講，喺附加賽有機會遇上嘅五隊入面，牌面上以賀芬咸同埋尼斯最有豬頭骨feel，所以呢個結果當然唔多好啦！高路普繼2015/16球季歐霸盃八強硬碰多蒙特之後，再次喺歐戰對德甲球隊。同時，賀芬咸都係紅軍新「九號仔」羅拔圖法明奴嘅舊東家，他喺2015年以2,900萬鎊（約2.9億港元）加盟紅軍，呢位巴西國腳曾為賀芬咸踢過140場德甲，錄得38個入球同埋24次助攻。
英超八月12號開鑼，紅軍首輪作客屈福特，高路普就話有傷在身嘅右後衞尼達利基尼應該趕唔切開季嘞！預計18歲青訓阿歷山大阿諾特將為紅軍鎮守右路，不過50歲嘅高路普都對紅軍上下充滿信心：「我需要做一啲好困難嘅決定，因為我冇可能畀所有球員都正選上陣。球員可以因為咁而嬲我，咁係冇問題嘅，最重要係保持信心。」
對於紅軍目前淨係買咗穆罕默德沙拿、安德魯羅拔臣同埋蘇蘭基三個新兵，高路普都認為滿意：「我嘅計劃係所有球員都建基於上季後再進一步。我一直話要繼續發展呢支球隊，就要喺買人同訓練兩方面着手，新球員表現幾好，佢哋或者係正選，又可能會推動咗其他球員進步。」
巴神領尼斯迎拿玻里
紅軍都唔多滿意之餘，對賀芬咸嚟講都係黑仔啦，30歲嘅教練尼高斯曼直情話：「呢啲咪叫梅菲法則（凡係可能出錯嘅事必定會出錯），利物浦係好硬淨嘅對手，不過我哋都好期待踢歐聯。」其他對碰方面，有巴洛迪利在陣嘅尼斯，就會對上季意甲三哥拿玻里，首回合先喺意大利舉行。
