立會主席梁君彥噚日接受民主黨劉慧卿嘅網台訪問，提起上個月財委會審批36億教育撥款大混亂件事。梁君彥噚日引述「第三手理解」話，當時葉建源搵過建制派，望建制派否決民主派提嘅臨時動議，不過，建制派不滿民主派「又食又拎」，所以唔制喎。
梁君彥喺訪問入面話，當時有議員想建制派幫手否決議員議案，點知佢講講吓，直頭講明嗰個係教育界議員，即係點咗葉建源名。
跟住梁君彥仲幫建制派口，話當時建制派唔提出縮短表決鐘，並非要畀啲顏色林鄭睇，而係覺得民主派提得出臨時動議，就唔能夠「又食又拎」咁着數，不過梁君彥講嘅係三手料，信唔信真係要諗過先！