建制派區議員喺區議會批公帑益自己友組織嘅新聞時有所聞，建制派一直以為民主派冇佢哋符，但係11名民主派深水埗區議員前日出招，發聲明不滿建制派區議員夾埋衞星團體，係咁申請預留撥款「自己申請自己批」，講明對11項不符合審計報告要求嘅傳閱撥款申請，一齊投反對票。
大家可能好奇怪，乜民主派喺區議會夠票否決咩？原來根據深水埗區議會規定，3萬元以上嘅撥款申請畀區議員傳閱投票，獲三分二議員同意先可以通過，結果民主派就搵到位還拖，因為深水埗23個議席入面，民主派有11席，夠晒票否決。
深水埗區議會夠票否決
咁若然建制派夠無恥，將益自己友嘅申請提交大會表決又點？咁就要多謝審計署4月出嗰份報告，話區議會利益申報做得唔夠透明，所以民政總署已講明利益申報表有一欄叫「其他」，話明申請撥款組織嘅主席、董事等職位都要申報，已經試過有建制派區議員因身兼申請團體嘅副主席同委員而冇得投票。民主派覺得只要跟足程序，就算去到大會，建制派要批錢益自己友都冇以前咁易。