機械人不一定要造到人咁高，麻省理工學院研究人員推出了名為「Project Kino」計劃，開發能在衣服上「爬」的「甲蟲」機械人，大家以後或有機會每日帶上三幾隻機械人出街使用。
「甲蟲」機械人透過磁鐵以及裝在底部的車輪，經程式控制下能自由地在衣服上滾動，但到底這款「甲蟲」機械人有甚麼用途？研究人員指用途都幾廣泛，如機械人識得走位改變衣服線條圖案，又或者能組合出不同形狀的裝飾物，亦可以透過內部感應器知道已經停雨，並自動拉低風褸帽子等等。功能好似都有幾多，不過先決條件是用家能忍受到有幾隻「甲蟲」機械人在身上爬來爬去，小記自問現時仍未可以接受得到。當然目前「Project Kino」只屬研發階段，仍有好多問題需要解決，如每隻「甲蟲」機械人電量只夠運作45分鐘，下一步要教導機械人在差不多無電時要自動爬去特定區域無線充電，而且機械人尺寸應該要縮返幾個碼先至無咁得人驚！
資料來源：MIT Media Lab
記者：布偉倫、許嘉欣
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily