前日正式返工嘅運輸及房屋局政治助理、自由黨員符傳富（Mark），噚日就陪上司、運房局局長陳帆現身立法會開會。阿Mark話，雖然啱啱返工，但局長有好多要求，佢亦有好多嘢做，前日朝早8點返工，近晚上9點先放工，坦言以前做Big Four工時更長，但就冇政府咁chur，起碼得閒買杯咖啡飲，𠵱家由於要睇好多文件，同不斷打電話，所以要同人開會時，先有機會飲杯咖啡。
阿Mark又話，過去因為經常去立法會開自由黨會議，亦去過唔少立會公聽會，所以對立會環境仲熟悉過政總，而又因常以訪客身份到訪立會，成日都要接受安檢，加埋佢中文名夠特別，所以唔少保安都認得佢。
內地人讀錯「負負褲」
講起佢個中文名，阿Mark就透露唔少內地人經常混淆佢名中個「傳」字做「傅」，所以讀起上嚟，就變成「負負褲」，笑言由細到大，都經常俾人讀錯。
噚日經民聯議員林健鋒一見到阿Mark，就叫啱佢個中文名，仲同佢握手，似乎冇乜介意佢個自由黨背景。