因為一地兩檢，立法會噚日暑假都要開會，其間立法會保安森嚴，除咗走廊加設圍欄，立法會秘書處仲突然喺一個出入口外加設咪兜，做法被唔少傳媒鬧爆。唔少傳媒都批評，新咪兜只會令採訪時更混亂，亦質疑秘書處喺重重關卡嘅立會出入口外，加設一個專畀噚日與會高官用嘅咪兜，無非係想擦鞋，幫高官避開記者追訪。
雖然傳媒早喺會前半小時，已促請秘書處收起個多餘咪兜，但秘書處當耳邊風，結果一眾高官離開時，果然「出事」，大批記者喺走廊同袁國強等官員逼一大輪，險象環生後，先可以扑咪。秘書處事後道歉，話安排只係出於保安考慮，唔少記者鬧秘書處安排多餘，認為官員只要好似平日咁，會後到採訪區受訪後離去，又點會有混亂？