去完佐賀鳥栖，次日早上坐新幹綫特急火車去鹿兒島，去年建築邦租車自駕遊，由福岡直去鹿兒島，中途在佐賀季樂吃佐賀牛，行吓停吓，一共用咗六小時車程，佢話其實幾攰㗎。左丁山無此耐力，坐高鐵算數，日本人在火車廂不能講電話，接發短訊用震機mode，絕不會高聲說話（嬰兒偶爾啼哭除外），所以車廂寧靜，坐火車好舒服，何況係由福岡市中心直達鹿兒島市中心，更加方便啦。
返到嚟睇7月30日星期日明報，李照興呢位內地高鐵常客寫內地高鐵，指車快則快矣，但車廂內乘客不斷走動，高聲吵鬧，廣播不絕於耳，港客如不習慣，精神會好緊張，而且從上車到終站，都在位於交通不甚方便嘅地點，故此李照興話如有選擇，在內地更喜歡搭飛機，希望將來港穗高鐵與日本寧靜程度看齊，是否奢望呢？
在鹿兒島中央駅西口不遠處，取得豐田租車，一上車冇幾耐，大雨傾盆，十幾分鐘後，上到城山酒店（Shiroyama），入去check in之後，有人話落雨水浸街，不如去浸溫泉，當然係一樂也；唔食午飯，浸完小睡一小時就到酒店「水簾」吃黑毛豬及鹿兒島牛肉火鍋，無以尚之，有人提醒：「你因住食完火鍋喉嚨乾，跟住咳，有排煩！」仲會咩，人老精，鬼老靈，經中醫資格嘅西醫醫生C指點，今次食火鍋，飲啤酒，臨瞓前，再沖飲一包余仁生「銀翹散」，第二朝起身，乜事都冇，晚上又可以到酒店另一間餐廳「楠」吃鐵板燒！
城山酒店以麵包聞名，晚上奇景之一，就係好多自結婚宴會散席走出嚟嘅人士，走入「水簾」對面嘅麵包店買麵包，於是到咗九點半關店時分，全店麵包幾乎冇剩。我哋係住客就唔駛去買嘞，早上吃自助早餐，麵包係同一產品，左丁山以太陽蛋送麵包，懶吃其他，直至到小Y Y發現有一味「真鯛潮茶漬」（鯛魚泡飯）係當地新創美食得獎嘅亞軍，極度美味，另外更有「雞炒飯」及自助迷你豬骨拉麵，都係食完可以再食嘅，於是左丁山貪心起，全部食齊，飽到唔識郁，當日午餐可以慳番。吃完去邊度好？肥仔K話舊年到海邊指宿「白水館」，今年不如上山，於是揸車去霧島神宮。神宮位於霧島山上，由城山酒店去，約一小時有多，沿途陽光燦爛，去到一處叫做久保田嘅地方，有巨型超市，於是入去洗手，發現超市內本地農產品繁多，左太去慣街市超市，一睇就嗌：「嘩，生果蔬菜好平，咪賺死一田？」咁又未必，計埋租金就唔係呢條數嘅嘞，香港超市何來如此大舖位兼門外免費空地停車場吖！出番超市，沿山路上山，半個鐘頭後到達神宮，有龐大停車場，但可直駛至神宮外圍落客，明顯要方便旅遊巴！