噚日喺新加坡訪問嘅行政長官林鄭月娥，最後一日行程除咗同新加坡總理李顯龍會面之外，亦去參觀當地嘅市區重建局，了解當地重建規劃同活化舊區工作，而林鄭此行亦好關心香港公務員，好似佢參觀當地政府設立嘅創新數碼服務實驗室，就問現場人員點鼓勵公務員多運用創新科技，又話香港雖然都有政府資訊科技總監辦公室，但就由公務員負責，同新加坡好唔同，好難推動唔同政府部門運用資訊科技。
林鄭又為香港公務員培訓取經，特別去睇當地嘅公共服務學院，林鄭仲講明，今次佢去參觀新加坡公共服務學院，就係要偷師，想喺任內籌備成立香港公務員學院，畀公務員喺公共行政同運用資訊科技進修增值，仲話公務員事務局局長羅智光將再出訪新加坡，似乎林鄭要成立公務員學院係勢在必行！