過去周末有個辯論比賽，有條辯題係講NBA球星「抱團」，組成三巨頭或者四巨頭，成隊一齊屈晒機去贏總冠軍。小弟對抱團嘅定義係，本身呢個球員有強隊核心唔做，走去另一支強隊做副手或者僚機。其實足球壇有段時間亦出現呢種抱團現象，例如亨利唔做阿仙奴核心，為歐聯冠軍去巴塞隆拿組成「Fantastic 4」。
巴塞同埋皇家馬德里，可以話係球壇最受歡迎嘅抱團，一來呢兩支球隊本身有江湖地位，又出得起錢，二來兩隊各有現今世界級球星坐鎮，當然係講緊美斯同基斯坦奴朗拿度（C朗）。蘇亞雷斯喺利物浦有大佬唔做，去到巴塞做三當家，而加里夫巴利亦係有英超首席球星唔做，去咗皇馬做C朗副手。抱團現象，造就超級強隊嘅出現，近九屆歐聯冠軍，皇馬同巴塞就拎咗六屆。
究竟幾個獨當一面嘅球星夾一隊超級強隊好，定係每個都獨自帶一支強隊好睇呢？小弟喺呢方面就不作判斷，只係今個夏天突然發生「反抱團」現象，足球壇尼馬同埋籃球壇K艾榮，都話想離隊。尼馬同艾榮情況相似，同樣係隊中阿二。騎士嘅艾榮唔想繼續活在勒邦占士陰影之下，想做球隊核心，而尼馬亦覺得自己夠班做領袖。尼馬跟咗美斯幾年，家陣都25歲，係大熟大勇之年，同埋睇巴西國家隊成績，就知以尼馬為核心嘅球隊亦可以好勁。
美斯雖然已經成30歲，但未有大幅下滑，尼馬見唔到佢可以短期內接班嘅希望。萬一美斯好似托迪咁老而彌堅嘅話，咁尼馬喺巴塞真係一世都做唔成大佬。二當家不甘人下，乃人之常情，亦係抱團型球隊嘅不穩定因素。
文：咖喱