轉會窗仲有接近一個月先完，不過已經有好多大牌轉會，好似盧卡古同艾華路莫拉達等，今時今日，球會揸住二、三千萬鎊，要買人就真係只可以搵吓新星、或者二、三線聯賽球星，就好似香港市民揸住一千幾百萬咁，只有資格買納米樓，千祈唔好望買到咩豪宅。
呢排最爆趣嘅轉會新聞，梗係尼馬即將轉會巴黎聖日耳門（PSG），尼馬亦充份演繹出為求達到目的不擇手段嘅態度，練波同新隊友開完拖後，國冠盃對完皇家馬德里入對手更衣室兼交換波衫，真係唔得罪巴塞球迷嘅嘢佢都唔做。睇討論區，巴塞迷重話佢「新費高」。
其實作為阿仙奴球迷，小弟對尼馬轉會真係心涼，講真巴塞之前咪又係成日硬撬對手主力，好似買法比加斯，當年出晒口術，甚麼加泰DNA，甚麼冠軍拼圖，最衰係指示巴塞青訓出身嘅連拿，喺世界盃冠軍慶祝會夾硬笠件巴塞波衫落法比度。好喇，2011年阿仙奴咪賣法比去巴塞，去到咪又係打後備，冇乜點重用下，2014年就賣咗去車仔。
不過身為廠迷，阿仙奴其實咪又係五十步笑百步，同樣面對阿歷斯山齊士（山神）扭計嘅傳聞，但講真，對於出售主力，阿仙奴都慣晒；唔計法比，亨利、尹佩斯同華美倫等隊長咪又係賣。所以尼馬離開，對巴塞都唔係咩末日，諗吓收番兩億鎊可以買咩人仲好。
講開扭計，尼馬、山神，甚至迪亞高哥斯達都係扭計王，佢哋都有共通點，就係南美出生。撇開美斯，其實南美兵忠誠度始終唔及歐洲兵，或者站喺佢哋立場，歐洲只不過係搵錢場地，搵夠就返南美嘆世界，要忠於一隊真係好難。
文：牽牛