今次到福岡，原本打算租車直奔鹿兒島，但較早前有雨災，恐怕出城後往鹿兒島道路有障礙，於是只係租車在附近一遊，去鹿兒島就坐特急新幹綫，75分鐘直達，非常方便，此班車早上開十一點廿七分，由東京開來，我地在福岡博多站上車，只停熊本一站，之後沿途不停站，故此好快到，車票就當然貴啲咯，8張車飛約需15萬日圓，買JR Pass之後換飛就可以比較平。
我地有租車，先去福岡動物園，讓三名小孩子觀看動物，因烈日當空，行動物園行到索晒氣，長者不宜也。去完之後，本想到崇基校友日本通Alfred推介之Seimombarai（漁師料理之店，位於博多區），點知連續三日爆滿，星期日休息，於是緣慳一面。次日就心思思揸車去佐賀市吃佐賀牛，行車約一小時，搵到最出名嘅「季樂」，星期日不設訂位，只可到場排隊，好彩我地係十二點半去到，「季樂」開十一點，限吃90分鐘，時間啱啱好，第一輪食客陸續離場，我地排隊輪候十幾分鐘就可以入內吃著名嘅佐賀牛，果然名不虛傳，薄薄牛肉切片，一擺落鐵鍋燒十幾秒便可入口，入口即融咁滯，肉香滿溢，揸車一個鐘頭來到，不虛此行。
佐賀附近有鳥栖名牌散貨場（Outlet），知名嘅美國品牌齊晒響度，星期日好似趁墟咁，五層高嘅停車場每層佔地甚廣，可容二三百架車，幾乎全滿，人客主要係日本人，少數香港人。左丁山繞場一周，發覺最好生意嘅就係位於場內末端嘅UA，唔怪得名牌以高價請體育明星做代言人啦，UA現有籃球天王史提芬居里，新鮮出爐嘅英國高爾夫球公開賽冠軍Spieth，人氣一時無兩，帶動呢度嘅UA，Outlet亦人頭湧湧，熱鬧過Timberland好多。九州主要城市之外圍，幾有加州feel，超市，甚至7仔外面，都有個大停車場，女士（相信係主婦，其中又以老婦為多）揸車來到門口，買完所需品即走。若非土地便宜，租金低廉，7仔點可以負擔得起在店外有個可容二三十架車嘅停車場呀，我地香港人真係無法子想像得到。
晚上回到博多區，高島屋商場內見店員多過見到客人，內有一間米芝蓮一星法國餐廳，晚餐收9600日圓，好似裏面人影都見唔到，於是走去天神大丸五樓嘅老牌西餐廳Cafe Royal，真係平靚正，送湯餐包係高身枕頭形，當今香港已不復見。老人家就記得1967年銅鑼灣大丸內嘅西餐廳有呢款餐包，睹物思人，想起父親當年試過有一次咁多，帶去大丸食餐，覺得好高級，頗有感觸。呢間Cafe Royal值得一試，一味焗海鮮飯可以食完又食。