特首林鄭月娥呢兩個月驛馬星動，噚日出發到新加坡同泰國，嚟緊8月仲有3次外訪，分別去北京、上海同杭州。佢噚日出發前特別喺特首辦見傳媒，原來係唔想大家山長水遠入機場為咗扑佢咪，其後細數班子上任「滿月」成績表，如推出36億元教育新資源、公佈一地兩檢方案等，就連之前流感高峯期佢同食衞局局長陳肇始去醫院探訪都有提。
而林鄭上任以來，多次重申官員要親力親為，講到明司局長要多落區向公眾講解政策，佢幫班子埋單計數，話司局長呢一個月出席咗20次立法會事務委員會、做咗10次落區探訪與區議員座談、10多次傳媒聚會、兼有逾百次傳媒訪問。作為政府最高話事人，咁詳細紀錄團隊嘅工作表現，試問佢嘅一眾手下，又點敢怠懶？