【《add》專訪】被網民轟耍大牌、冠上「時裝車禍」惡名……關於鄧紫棋（G.E.M.）的新聞，總離不開是非。她承認好介意流言蜚語，入行九年逐漸學懂調整心態。這一年，她還醒覺多了一個層面來表現自己，「同唱歌一樣，點樣去dress自己都係表達自己嘅一個方式。」她終於正視服裝常出錯的問題，相信造型師男友Mark Ngai功不可沒。
造型、撰文：林嘉慈
攝影：郭賢興
化妝：Phoebe Ho of Spotlight Image
髮型：Alida Yip
場地提供：Studio King
鄧紫棋憑小巨肺之名，唱到去內地歌唱比賽、開巡唱狂賺人仔，但在起步點香港卻收到無數包括態度及造型的負評，一度令她糾結。不過她已慢慢學習應對，她說：「學識點樣隨意啲去面對所有嘢，輕鬆好多。」
尿布褲冇問題
對於去年被批評的高腰尿布登台裝，G.E.M.也輕鬆回應，「如果揀多一次，可能會拎走個pale purple嘅bra，同埋化妝上嘅閃石、耳環，其實我覺得條褲冇乜問題㗎，如果我上台前冇食咁多嘢，哈哈！」她認為錯在配搭，「係因為我唱remix歌，嗰一種曲風你dress得浮誇少少都OK。拎走個bra，換過個入去，可能係一個cropped top，同下面個texture一樣，rather than一個fishnet加個bra。」
G.E.M.說：「以前我淨係顧唱歌，人哋畀乜我着我就着，完全冇要求。」唯一會思考是拍拖如何打扮，「以前拍拖，約會前會打扮半個鐘、一個鐘先出街。」最近一年才在穿衣方面多花心思，「開始發現其實同唱歌一樣，點樣去dress自己都係表達自己嘅一個方式，音樂可以表現性格，點樣着衫都可以。」她落力惡補時尚知識，講得出喜歡Maison Margiela及Alexander McQueen，置裝費亦大增，「得閒冇嘢做，自己喺app度㩒下㩒下又買嘢。」
「一定有磨合」
相信造型師男友Mark Ngai對G.E.M.影響不少，G.E.M.說：「身邊好多人都影響我，一嚟自己大個啲，開始覺得每一樣嘢都係人哋幫你take responsibility，其實咁你係邊個呢？好似所有character都係人哋畀你咁，呢個係我學習到唔同方面嘅責任都係你要去take多少少。」問可會因此與Mark在工作方面多衝突？她說：「做嘢一定會有磨合，由4月開始就同多咗唔同嘅stylist合作，無論好婉轉定直接表達，都需要磨合。」
G.E.M.的巡唱下月來到香港站，她已提早兩個月向歌迷做民意調查，屆時會唱原創作品，由小至大喜歡的廣東歌，「比較緊張，因為好多朋友搵我買飛，我幻想死啦，到時喺台上望落去全部都係我識嘅人！」
缺點係貪靚
G.E.M.在音樂方面擁有個人想法的優點，問她缺點是甚麼？她說：「你知每個女仔都貪靚㗎啦！好介意人哋去評論你嘅身形，或者唔講外形，好多時有流言蜚語，對你嘅reputation係點。」話題又扯回介意外界抨擊上，她覺得處於網絡平台發達的世代，網絡欺凌無可避免，「睇過一本書，話每個人都會承受唔同方面嘅流言蜚語，唔係淨係公眾人物先需要面對，日日都唔知幾多網民嘈交。諗返未入行時，都喺網上欺凌人哋，係好普遍嘅事情，需要去適應、調整心態。」
更多精采時尚內容，盡在 http://add.appledaily.com 。