上市公司高薪請「自己人」或「無履歷妙齡少女」做執行董事就聽得多，但噚日喺創業板上市嘅中國幸福投資（8116）公佈，月薪一萬，就請到位有8年工作經驗嘅人做集團執行董事。
公告話，呢位執董叫李嘉琪，芳齡30，持有暨南大學英語商業管理理學士學位及專業秘書及管理訓練證書，同時持有WSET葡萄酒及烈酒第二級證書，於公共關係範疇擁有逾8年經驗，並於旅遊及私人飛機管理及安排範疇擁有逾5年經驗，委任即日生效。
中國幸福投資從事銷售紅酒、雪茄及高爾夫產品，賣嘅都係貴價用品，但李嘉琪年薪12萬元，即係一個月一萬蚊咋，家陣請個洗碗工都唔得喇。
有機會真係想問問李小姐，假假地都大學畢業（唔好理乜大學），工作經驗又豐富，點解咁抵得諗，用「優惠價」做呢份工。需知道，上市公司執董職責好繁重，好多責任要負㗎。