呢屆政府講明要同傳媒打好關係，除咗特首林鄭月娥同政務司司長張建宗，一眾局長輪住嚟同傳媒開餐，噚日就由政制局局長聶德權同商經局局長邱騰華登場，仲各自孖住新副局長陳帥夫同陳百里，一行四人同傳媒connect，三耳局長仲搞爛gag，話呢個係「一帶一路及大灣區」組合，皆因呢兩個議題咁啱由佢哋呢兩個局主理，真係hardsell至極。
點解有公務員鐵飯碗唔要，反而入火海跳入問責團隊？如果冇聶德權引薦，相信44歲嘅陳帥夫都未必肯制，陳帥夫話呀，未來會以工作報答三耳局長嘅知遇之恩，亦話覺得自己「做得嚟」副局長呢份工，仲大讚傳媒工作好重要，因為佢自己都係睇報紙先知道，自己獲得副局長此職喎。
三耳局長自爆1993年喺公務員事務局負責管理政務職系，陳師夫則喺1994年出任政務主任，兩人亦曾經喺食衞局共事，「可謂係由細睇到佢大」，八方相信唔會睇住佢壞啩？
林鄭講明現時唔搞重啟政改，聶德權係咪就此好輕鬆？似乎唔係，因為除咗新一屆政府好重視嘅大灣區等內地事務，三耳局長話政制局嚟緊嘅主要工作，係立法禁止一切對餵哺母乳婦女作出直接或間接嘅歧視，下個立法年度會交法例畀立法會審議。
星星局長抄薯片拍住上
環境局副局長謝展寰同續任政治助理嘅區詠芷都喺噚日履新，不過就冇見記者，環境局局長黃錦星噚晚喺facebook貼文，以「新一Team」為題話新一屆環境局團隊埋班，朝早8時半舉行早禱會後工作浪接浪，包括準備施政報告與青年交流環保政策。
星星局長仲讚謝展寰從事環保卅幾年，涉獵多個環保專業範疇，仲疑似參考薯片叔參選特首時短片「拍住上」系列口號，聲稱「我同副局謝Sir政助Michelle，環保同行拍住上！仲有大嘥鬼/慳神㖭！」
李八方