因為高鐵一地兩檢爭議，香港氣溫熱上加熱，立法會內務委員會召開特別會議傾一地兩檢前夕，立法會議員獲港鐵邀請參觀西九站同石崗列車停放處，民主派杯葛下，只有建制派參與，人數亦唔多，部份身兼行會成員嘅立法會議員查實日前已經視察咗。
雖然人數唔算多，港鐵依然嚴陣以待，有份參觀嘅立法會議員大讚港鐵主席馬時亨陪足全程好落力，引述肥馬話，每次巡完工地都會減磅，難怪見到肥馬噚日件衫有啲鬆，果然瞓身做埋港鐵大公關。
隨團嘅民建聯陳克勤就對駕駛室嘅儀器好感興趣，愛打機嘅佢自稱「電車男」，情迷模擬駕駛遊戲《電車GO！》，聲稱未試過誤點；一見到駕駛室嘅設計熟口熟面，即刻問港鐵職員係咪照住《電車GO！》設計？結果係……唔係！