去年到鹿兒島旅行，遇着航班誤點，回程又碰上香港掛八號風球，搞到幾無癮，好彩住在鹿兒島城山酒店及指宿白水館，浸溫泉夠晒爽神，算係補番條數。今年又去鹿兒島嘞，不過今次乘搭港龍航機直達福岡，順風順水，非常準時，三小時有多嘅航程，居然未遇過一次氣流，幾有運氣吖，所以一到埗啫，精神特別爽利，坐穿梭小巴（豐田汽車）到機場對面嘅豐田租車（透過東瀛遊預訂），取車返回機場載人到福岡運河城君悅酒店（Grand Hyatt Fukuoka），半個鐘頭就到。
運河城當然唔夠博多駅咁熱鬧，但內裏食肆、服裝店、藥房齊備，商場與酒店只是一橋之隔，相當方便。1980年代中期，沙田新城市廣場有音樂噴泉，每日有噴泉表演，吸引不少成年人與小孩圍觀，今日新城市已無噴泉，但在運河城有噃，更加現代化，晚上加上七彩燈光投射，水柱隨音樂節奏彈跳，更加好睇。
之前未曾試過，今次走出酒店及運河城商場吃晚飯，見斜對面有一間居酒屋，居然有人在門前排隊，可能係好嘢噃，於是在商場內逛無印良品、欣賞有文化嘅休閒擺設一番，八時過後才到居酒屋，呢次有客人剛離開，我哋成間房要晒，唔使排隊，由肥仔K講日文點菜，有刺身、壽司、燒魚、煎牛肉等等，味道水準出乎意料咁好，遠勝幾年前在東京涉谷食過嘅一間居酒屋，急忙記低名字，就係叫做「博多官兵衞」，離開君悅酒店正門只係三分鐘腳程，以後可以再來。
來到福岡，其實冇乜shopping好做，大丸百貨龐大無比，只可惜人丁單薄，顧客寥寥，高島屋之Riverain Mall內裏有寬敞空間設計好適合文化人欣賞，但又係冇乜幾個顧客嘅啫，二樓有一個面積比較大嘅兒童樂園（playroom），啱晒小YY及肥仔K兩人嘅仔女入去玩。
天神博多區係福岡中心區噃，不景氣如此，幾令商人頭痛，唯一人氣旺場嘅就係博多駅商場，一個車站搶盡零售生意。男人買衫就去天神「青木」（AOKI）最容易，並非高價名牌貨，但晒士非常啱，左丁山走入去買E4西裝，一穿即合。肥仔K夠肥，就有K7 fit晒佢，小YY丈夫身形夠晒標準，售貨員一睇就叫佢試穿A7，又掂，日本人之設計，真係準確到無倫，只係需要改褲腳嘅啫，幾條褲，兩日後就可以攞貨，上年來此店，要出動肥仔K做繙譯員，今年已有一位來自重慶嘅女店員，捉住我哋猛咁介紹不同服裝，最後竟然將一件標價七萬九千日圓嘅茄士咩中褸，以一萬日圓推銷，平到簡直無法抗拒，結果又係益咗身材最fit嘅小YY老公。