曼聯官方宣佈29歲嘅塞爾維亞中場尼曼查馬迪以4,000萬鎊（約4.1億港元）正式由車路士轉投紅魔，雙方簽約三季，亦有選項可續多一年。
馬迪值唔值4,000萬鎊見仁見智，不過紅魔今夏使咗過億鎊買新兵，都要諗計回回血，最近同一個出名嘅交友app傾緊，來季會喺紅魔波衫上面落廣告幫補吓。
摩佬鍾意翻兜舊部
身高1米94嘅馬迪將會着31號波衫，作為車仔舊部，馬迪正係紅魔領隊摩連奴今夏第三簽，同時亦係桑馬達後另一位由車路士轉入曼聯嘅球員。不過摩連奴一向有翻啅癮，英國有傳媒翻查資料，馬迪係佢第10位重簽嘅球星，好似初帶車路士時代，摩連奴已經簽番文尼治、保羅費拉拿兩位波圖舊部；到做皇家馬德里教練，摩連奴又簽番前車仔中堅卡維奴。
所以，今次以曼聯領隊身份，繼買盧卡古後，就再買馬迪。摩連奴大讚馬迪：「佢係一位有野心、忠誠、穩定、為球隊服務嘅球員。我好多謝佢加盟曼聯嘅決心，否則交易難以成事。」馬迪就話期待同摩連奴故劍重逢：「再次同摩帥合作係我不能拒絕嘅機會，我期待盡快同新隊友開始訓練，並成為偉大球會曼聯嘅歷史一部份。」馬迪周二首次同新隊友集訓，撞正佢29歲生日，佢全程孖住前車仔隊友桑馬達一齊操。雖然曼聯買咗三位新兵，但7號仍然懸空，唔知係咪留畀國際米蘭中場比列錫呢？
使12億擴軍未夠喉
不過計埋中堅域陀連迪路夫，紅魔已經使咗超過1.2億鎊（約12億港元）擴軍，加埋新一季有份踢歐聯，會方亦公佈埋獎金，如果拎到歐聯同英超雙料冠軍，仲會豪派400萬鎊（約4,100萬港元）獎金畀球員，真係一闊三大。為咗開源，曼聯正同交友app Tinder傾緊合作，後者將會喺紅魔嘅波衫衫袖賣廣告，而Tinder每年會畀曼聯1,200萬鎊（約1.2億港元）贊助費。由英超聯賽會提出嘅衫袖廣告，係各球會喺新球季開始增加收入嘅新渠道，目前已經有包括車路士、曼城等九間球會簽咗衫袖廣告。