富二代通常要接手家族生意，不過深圳地產商京基集團太子爺陳家榮，除咗地產，似乎仲諗住喺股市大展拳腳。
舊年美圖（1357）上市，佢以1.2億美元（9.3億港元）做基礎投資者，先令佢喺香港打響名堂。近半年佢又動作多多，投資落幾間上市公司，啱啱又投資埋英裘控股（1468），博佢由皮草貿易轉型做證券業，睇嚟對港股好有興趣。
講起京基集團，最出名要數公司2011年起咗深圳最高大廈「京基100」，顧名思義，有100層咁高。陳家榮就係京基創辦人陳華個仔，今年29歲，據了解，2014年返家族生意幫手前，佢曾經喺平安證券做投行業務。
陳家榮目前係京基集團副總裁，幫公司推出國產動畫、投資高新科技互聯網行業投資等。據聞，佢非常認同畢菲特「別人恐懼我貪婪」嘅理論，所以美圖股價回落時，佢又大手增持，持股量升到14.23%。