當新聞主播成為熱廚房同演藝界搶手貨，會唔會刺激一班年輕人，好想上堂學做主播？唔好以為難過登天，皆因主播冇特定要求，相貌標致係咪重要？呢啲嘢見仁見智，當然都有啲專業知識同技巧，先登到大雅之堂。
「深受歡迎」作招徠
城大專上學院就搵咗無綫新聞前主播葉昇瓚開班授徒，教授點樣做主播。
1983年出生嘅葉昇瓚原來喺城大畢業，難怪母校會搵佢開課講學。到底呢個名為「主播技巧課程」嘅6節合共12小時課程有乜學？課程簡介話，先後喺now新聞台同無綫做過嘅葉昇瓚，會透過理論、實踐同專業嘅語音表，改善學生咬字發音，仲有形象指導、服飾髮型，課程單張大讚葉昇瓚「深受市民歡迎」。
由前主播教人點做主播，夠唔夠吸引力呢？要做主播，又至少要有幾多成本呢？課程簡介話，1,500蚊6堂，一堂兩小時，即係每小時125蚊，城大同城大專上學院學生、畢業生、教職員等學費都有9折，唔知會唔會培訓到方健儀同吳璟儁二號呢？
李八方